အတွင်းလူသတင်းပေးပို့ခြင်း

လုပ်ငန်းစုသည် အဖွဲ့အစည်းအတွင်း ဂုဏ်သိက္ခာနှင့်တာဝန်ခံမှုတို့တွင် အမြင့်ဆုံး စံချိန်စံညွှန်း ရရှိစေရန်အတွက် အလေးထားလုပ်ဆောင်ပါသည်။ ဤခံယူချက်ဖြင့် ကုမ္ပဏီသည် ဝန်ထမ်းများအားလုံးအနေဖြင့် ကုမ္ပဏီ၏ လုပ်ငန်းစဉ်များ၊ လုပ်ငန်းလည်ပတ်မှုတို့နှင့် ပတ်သက်၍ မလျော်ကန်မှုများ၊ မဖွယ်ရာမှုများနှင့် စိုးရိမ်မှုများရှိပါက ထိုကိစ္စရပ်များကို ပွင့်လင်းစွာ ဖော်ထုတ်တိုင်ကြား သတင်းပေးပို့နိုင်ရန်နှင့် လိုအပ်သည့် အရေးယူဆောင်ရွက်မှုများ ပြုလုပ်နိုင်ရန် ကုမ္ပဏီမှ ဖော်ပြပါ လုပ်ထုံးလုပ်နည်းများ (“မူဝါဒ”) ကို ရေးဆွဲထားရှိပါသည်။

ဤမူဝါဒကြောင့် မလျော်ကန်မှုများနှင့် သံသယဖြစ်ဖွယ်ရာ ကိစ္စရပ်များကို ဝန်ထမ်းများအနေဖြင့် ကြောက်ရွံ့ခြင်းမရှိဘဲ နောက်ဆက်တွဲဖြစ်လာနိုင်သည့် အကျိုးဆက်များကို ပူပန်စရာမလို လွတ်လပ်စွာ တိုင်ကြားနိုင်ပါသည်။ အထူးသဖြင့် ဤမူဝါဒသည် ကုမ္ပဏီအတွင်း ဖြစ်ပွားနေသော စိုးရိမ်ဖွယ်ရာ ကိစ္စရပ်များကို ပိုမိုဆိုးရွားလာစေခြင်း (သို့) ထိုကိစ္စရပ်များအား ဖြေရှင်းရန် ပြင်ပမှ အခြားနည်းလမ်းများကို ရှာဖွေမည့်အစား ဝန်ထမ်းများအား ဖော်ထုတ်တိုင်ကြားနိုင်စေမည့် လုပ်ပိုင်ခွင့်အား ပေးလိုခြင်းဖြစ်ပါသည်။

ဤမူဝါဒသည် ကုမ္ပဏီမှ ရှင်းလင်းစွာ ထုတ်ပြန်ခဲ့သည့်အတိုင်း ကုမ္ပဏီ (သို့) ၎င်း၏ ဝန်ထမ်းများ၊ ဒါရိုက်တာများ (သို့) အရာရှိများ၏ မလျော်ကန်သော လုပ်ရပ်များအတွက် တိုင်ကြားမှုကို သိရှိရသည်နှင့် စေ့စပ်သေချာစွာ စုံစမ်းစစ်ဆေးကာ အခြေအနေပြန်လည်ကောင်းမွန်လာအောင် မှန်ကန်သော လုပ်ရပ်များဖြင့် ပြုပြင်သွားမှာဖြစ်ပါသည်။ ကုမ္ပဏီအနေဖြင့် နောင်တွင် အလားတူကိစ္စရပ် ထပ်မံဖြစ်ပွားခြင်း မရှိစေရန် မူဝါဒများကိုလည်း အတတ်နိုင်ဆုံး လေ့လာဖော်ထုတ်သွားမှာ ဖြစ်ပါသည်။

ဤတိုင်ကြားမှုယန္တရားသည် ကုမ္ပဏီ၏ ဂုဏ်သတင်းနှင့် အများပြည်သူ၏ ယုံကြည်မှုကို ထိန်းသိမ်းနိုင်ရန်အတွက် ဝန်ထမ်းများအား ဘက်လိုက်မှုမရှိ တာဝန်သိတတ်စွာ လုပ်ဆောင်ကြရန် တိုက်တွန်းထားခြင်းဖြစ်ပါသည်။ အဖွဲ့အစည်းအတွင်း ပွင့်လင်းမြင်သာမှုရှိသည့် ယဉ်ကျေးမှုတစ်ရပ်ကို ပြုစုပျိုးထောင်၍ ဖွံ့ဖြိုးတိုးတက်စေခြင်းဖြင့် ဤလုပ်ငန်းစဉ်ကို အထောက်အကူပြုပြီး ပိုမိုထိရောက်စေမှာဖြစ်ပါသည်။ ထို့အပြင် ဤမူဝါဒ၏ နောက်ခံအချက်များကို အောက်ဖော်ပြပါ မေးခွန်းများနှင့်အဖြေစာရင်းတွင် အကျဉ်းချုပ်ဖော်ပြထားပါသည်။ ဤဖော်ပြချက်များသည် ဝန်ထမ်းများအား လမ်းညွှန်လိုရန် ရည်ရွယ်ထားခြင်းဖြစ်ပြီး ဤလမ်းညွှန်ချက်များနှင့်ပူးတွဲပါရှိသော မူဝါဒအပြည့်အစုံကို သေချာဖတ်ရှုကြရန် တိုက်တွန်းလိုပါသည်။

၁။ အတွင်းလူ သတင်းပေးပို့ခြင်း (Whistle Blowing) ဆိုတာဘာလဲ။

ကုမ္ပဏီအတွင်း နေရာအနှံ့တွင် တာဝန်ထမ်းဆောင်နေကြသော ဝန်ထမ်းများသည် ကုမ္ပဏီအတွင်း တစ်စုံတစ်ခု မှားယွင်းပြီဆိုပါက အရင်ဦးဆုံး သတိထားမိသူများ ဖြစ်ကြပါသည်။ သို့်သော် ထိုမှားယွင်းမှုများကို မသိချင်ယောင်ဆောင်သော အလေ့အထကြောင့် စီမံခန့်ခွဲရေးအဖွဲ့အနေဖြင့် ကြီးမားသည့်ထိခိုက်မှုများ မဖြစ်ပေါ်မီ လိုအပ်သော လုပ်ငန်းဆောင်တာများကို ဆောင်ရွက်ခွင့် ရရှိမည်မဟုတ်ပါ။ ထို့ကြောင့် whistle Blowing ဆိုသည်မှာ တရားမဝင်နိုင်ခြေရှိသည့် သတင်းအချက်အလက်များ နှင့် / သို့ ကိုယ်ကျင့်တရားနှင့် မကိုက်ညီသောအမူအကျင့်များ (ဥပမာ-ကုမ္ပဏီအတွင်း မဖွယ်မရာဖြစ်မှု) အကြောင်းကို အသိပေးခြင်းဖြစ်သည်ဟု ဆိုနိုင်ပါသည်။

၂။ မရိုးသား၊ မဖွယ်မရာဆိုတာဘာလဲ။

ဥပဒေနှင့်ဆန့်ကျင်သော၊ တရားမဝင်သော၊ လူ့ကျင့်ဝတ်ကိုသွေဖီသော (သို့) သင့်လျော်မှုမရှိသည့် အပြုအမူ နှင့် အခြားအရာများဖြစ်သော

(က) တရားမဝင်သော၊ ရာဇဝတ်မှုဆိုင်ရာ (သို့) ဥပဒေနှင့်ဆန့်ကျင်သော အပြုအမူ၊ လုပ်ရပ်

(ခ) ကုမ္ပဏီ၏မူဝါဒကို ချိုးဖောက်ခြင်း (သို့) အကောင်အထည်မဖော်နိုင်ခြင်း (သို့) လိုက်နာရန်ပျက်ကွက်ခြင်း

(ဂ) ကုမ္ပဏီပိုင် ဘဏ္ဍာငွေကို ခွင့်ပြုချက်မရှိဘဲ သုံးစွဲခြင်း

(ဃ) လုပ်ငန်းစု၏ ဌာနတွင်းနှင့် ဘဏ္ဍာရေးဆိုင်ရာ ကြီးကြပ်ထိန်းသိမ်းရေး လုပ်ငန်းစဉ်နှင့် မူဝါဒအား လိုက်နာမှုမရှိခြင်း

(င) သံသယဖြစ်ဖွယ် ငွေစာရင်း (သို့) ငွေစာရင်းစစ်ဆေးမှုများ ပြုလုပ်ခြင်း

(စ) ခွင့်ပြုချက် မရရှိထားသော အကြောင်းကိစ္စ (သို့) ဖုံးကွယ်ထားသော အကြောင်းကိစ္စအတွက် အာဏာ (သို့)လုပ်ပိုင်ခွင့်ကို အလွဲသုံးစားလုပ်ခြင်း

(ဆ) မှန်ကန်မှုမရှိသောသတင်းများကို လူထုအဖွဲ့အစည်းများထံသို့ ရည်ရွယ်ချက်ရှိရှိဖြင့် ပေးပို့ခြင်း

(ဇ) အထက်ဖော်ပြပါ ကိစ္စရပ်နှင့်ဆက်စပ်သည့် သတင်းအချက်အလက်များကို ဖုံးကွယ်ခြင်း (သို့) ဖုံးကွယ်ရန် ကြိုးစားခြင်း။

၃။ မူဝါဒချမှတ်ရခြင်း၏ ရည်ရွယ်ချက် -

မူဝါဒချမှတ်ရခြင်း၏ အဓိကရည်ရွယ်ချက်မှာ -

(က) ဝန်ထမ်းများအား ၎င်းတို့စိုးရိမ်ပူပန်စရာ ကိစ္စရပ်များကို ထုတ်ဖော်ပြောကြားနိုင်သည့် ယုံကြည်မှုရှိလာစေရန်နှင့် ထိုကိစ္စရပ်များအတွက် လိုအပ်သည်များကို အရေးယူ ဆောင်ရွက်နိုင်စေရန်

(ခ)ဝန်ထမ်းများအနေနှင့် ၎င်းတို့၏စိုးရိမ်ပူပန်မှုများကို ဖော်ထုတ်တင်ပြနိုင်မည့် နည်းလမ်းရှိစေရန်နှင့် အရေးယူမှုများနှင့်ပတ်သက်သည့် ရလာဒ်အဖြေကို သိရှိနိုင်စေရန်

(ဂ)၎င်းတို့၏ ယုံကြည်ချက်နှင့် စိတ်ရင်းစေတနာဖြင့် ဖော်ထုတ်တင်ပြသော စိုးရိမ်မှုများအတွက် လက်စားချေခံရခြင်း (သို့) ရန်တုံ့ပြန်ခြင်းတို့မှ ကာကွယ်ပေးမည်ကို ဝန်ထမ်းများအား သိရှိစေရန်

(ဃ)ဖော်ပြပါကိစ္စရပ်များအတွက် အတွင်းလူသတင်းပေးပို့ရန် မသင့်လျော်ကြောင်းနှင့် ပိုမိုသင့်လျော် ကောင်းမွန်သော စီမံချက်နှင့် လုပ်ငန်းစဉ်များရှိကြောင်း ဝန်ထမ်းများအားသတိပေးရန်။ (ဥပမာ- ဝန်ထမ်းများ၏ ပုဂ္ဂိုလ်ရေး မကျေနပ်ချက်၊ နစ်နာချက်များကြောင့် ဌာနဆိုင်ရာများသို့ တိုင်ကြားခြင်း (သို့) မိမိအကျိုးခံစားခွင့်များနှင့် ပတ်သက်၍ မကျေနပ်ချက်များကို လူသားအရင်းအမြစ်ဖွံ့ဖြိုးရေး ဌာနထံ တိုင်ကြားခြင်းများ။)

၄။ မည်သူက တိုင်တန်းချက်ဖွင့်လို့ရပါသလဲ။

အောက်ပါမူဝါဒအတိုင်း ထုတ်ဖော်ခြင်း (သို့) တိုင်ကြားခြင်းများ ပြုလုပ်သည့် ဝန်ထမ်းတိုင်းအား အကာအကွယ်ပေးသွားမည်ဖြစ်ပါသည်။

(က) သဘောရိုးဖြင့် သတင်းအချက်အလက်များကို ဖော်ထုတ်ခြင်း၊

(ခ) မှန်ကန်ကြောင်းယုံကြည်နိုင်ရန် သင့်လျော်သော အကြောင်းပြချက်ရှိခြင်း၊

(ဂ) ရန်ငြိုးဖြင့် လုပ်ဆောင်မှု မဟုတ်ခြင်း နှင့်

(ဃ) ကိုယ်ပိုင် အကျိုးအမြတ် (သို့) ငွေကြေး အမြတ်အစွန်း ရှာဖွေမှုမဟုတ်ခြင်း

၅။ မည်သူနှင့် ဆက်သွယ်ရမလဲ

ကုမ္ပဏီ၏ ပွင့်လင်းသောမူဝါဒအရ ဝန်ထမ်းတိုင်းသည် မိမိသိလိုသောမေးခွန်းများ၊ စိုးရိမ်ပူပန်မှုများ၊ အကြံပြုချက်များ (သို့) မကျေနပ်ချက်များအတွက် ကောင်းမွန်စွာ ကိုင်တွယ်ဖြေရှင်းနိုင်သူထံသာ ဖွင့်ပြောအသိပေးရန် အကြံပြုလိုပါသည်။ စီမံခန့်ခွဲရေးနှင့်ပတ်သက်၍ ကိုင်တွယ်ခြင်းမရှိသော ညွှန်ကြားရေးမှူးများ (“Non-Executive Directors”) ကသာ ထိုကိစ္စရပ်များကို ကိုင်တွယ်ဖြေရှင်းရန် အသင့်လျော်ဆုံး ဖြစ်သည်။ လက်ခံရရှိသော သတင်းအချက်အလက်များကို အထူးလျို့ဝှက်ထားရှိပြီး ဘုတ်အဖွဲ့မှခန့်အပ်ထားသော သက်ဆိုင်ရာ အမှုထမ်းမှ ကိုင်သွယ်ဖြေရှင်းဆောင်ရွက်ပေးမည်ဖြစ်သည်။ အတွင်းလူသတင်းပေးပို့သည့် အစီရင်ခံမှုတွင် ဒါရိုက်တာ (သို့) အကြီးတန်း စီမံခန့်ခွဲမှုမှ အရာရှိများ (ဌာနဆိုင်ရာ ခေါင်းဆောင်၊ အုပ်ချုပ်သူ၊ မန်နေးဂျင်းဒါရိုက်တာနှင့်အထက် ရာထူးများ) ပါဝင်ပတ်သက်နေပါက အစီရင်ခံတိုင်ကြားမှုကို Non-Executive Director ထံ အောက်ပါ QR Code (သို့) အစီရင်ခံစာကို အမည်နာမ ဖော်ပြခြင်းမရှိဘဲ whistleblowing@yoma.com.mm မှတစ်ဆင့် အီးမေးပေးပို့ အကြောင်းကြားနိုင်ပါသည်။

၆။ ကုမ္ပဏီ၏ တုန့်ပြန်မှု

အတွင်းလူသတင်းပေးပို့သည့် အစီရင်ခံမှုတွင် ဒါရိုက်တာ (သို့) အကြီးတန်း စီမံခန့်ခွဲမှုမှ အရာရှိများ (ဌာနဆိုင်ရာ ခေါင်းဆောင်၊ အုပ်ချုပ်သူ၊ မန်နေးဂျင်းဒါရိုက်တာနှင့်အထက် ရာထူးများ) ပါဝင်ပတ်သက်နေသော အစီရင်ခံတိုင်ကြားချက်များမှလွဲ၍ အတွင်းလူသတင်းပေးပို့သည့် အစီရင်ခံမှုအားလုံးကို ဒါရိုက်တာမှ စာရင်းပြုစု မှတ်တမ်းတင်ထားမည်ဖြစ်ပါသည်။ ဒါရိုက်တာမှ တိုင်တန်းချက်အား ကနဦးသုံးသပ်ချက်ပြုလုပ်ပြီး၊ တိုင်တန်းချက်နှင့်ပတ်သက်၍ ကုစားပျောက်ကင်းစေရေး၊ စည်ကမ်းထိန်းသိမ်းရေး (သို့) ကိစ္စရပ်၏ အနေအထားပေါ်မူတည်၍ ကုမ္ပဏီမှ အရေးယူဆောင်ရွက်မှုတို့ကို ပြုလုပ်သွားမည်ဖြစ်သည်။ စုံစမ်းစစ်ဆေးမှုှုများ၏ ရလဒ်များကို စီမံခန့်ခွဲရေးအဖွဲ့အား သိရှိစေရန်နှင့် လိုအပ်သည့် ဆောင်ရွက်ချက်များအတွက် စီမံခန့်ခွဲရေးအဖွဲ့ထံ ဆက်လက်တင်ပြမည်ဖြစ်ပါသည်။

ဖော်ထုတ်တင်ပြလာနိုင်သော အကြောင်းအရာများကို -

• ရုံးတွင်းစုံစမ်းစစ်ဆေးမှုပြုလုပ်ခြင်း
• ပြင်ပ စာရင်းစစ် ကိုလွှဲပြောင်းပေးခြင်း
• သင့်လျော်သော ဥပဒေပြုအဖွဲ့များကိုလွဲပြောင်းပေးခြင်း
• လွတ်လပ်သော စုံစမ်းစစ်ဆေးမှု ပြုလုပ်ခြင်း

အတွင်းလူသတင်းပေးပို့သည့် အစီရင်ခံမှုတွင် ဒါရိုက်တာ (သို့) အကြီးတန်း စီမံခန့်ခွဲမှုမှ အရာရှိများ (သို့) Nonexecutive Vice Chairman တို့ ပါဝင်ပတ်သက်နေပါက လိုအပ်သည်များကို ဆက်လက်လုပ်ဆောင်နိုင်ရန် အစီရင်ခံတိုင်ကြားမှုကို ဘုတ်အဖွဲ့၏ ဥက္ကဋ္ဌထံ အသိပေးအကြောင်းကြားရပါမည်။

လူတစ်ဦးချင်းစီ နှင့် ပြစ်မှုကျူးလွန်ကြောင်း (သို့) မသမာမှုကျူးလွန်နိုင်ဖွယ်ရှိကြောင်း စွပ်စွဲခံရသူတို့ကို ကာကွယ်နိုင်ရန် စုံစမ်းစစ်ဆေးမှုအား ပြုလုပ်ရန်သင့်၊ မသင့်နှင့် လုပ်မည်ဆိုပါက မည်သည့်ပုံစံဖြင့် လုပ်မည်ကို ဆုံးဖြတ်နိုင်ရန် ကနဦးစုံစမ်းမေးမြန်းခြင်းကို ဆောင်ရွက်ပါမည်။ အချို့ကိစ္စများကို စုံစမ်းစစ်ဆေးမှုမလုပ်ပဲ အားလုံး၏ သဘောတူညီချက်ဖြင့် ဖြေရှင်းနိုင်မည်ဖြစ်ပါသည်။ အကယ်၍ အရေးပေါ်ဆောင်ရွက်ရန် လိုအပ်ပါက ဤအဆင့်ကို မည်သည့်စုံစမ်းစစ်ဆေးမှုများမှ မပြုလုပ်မီ လုပ်ဆောင်ရမည်ဖြစ်သည်။

တိုင်တန်းသူသည် ၎င်းတိုင်တန်းခဲ့သောကိစ္စကြောင့် အခက်အခဲများရင်ဆိုင်ရပါက ကုမ္ပဏီအနေဖြင့် ယင်းအခက်အခဲများ လျော့နည်းသွားစေရန် လုပ်ဆောင်ပေးသွားမည်။ ဥပမာ- တရားလိုက ရာဇဝတ်မှုဆိုင်ရာ (သို့) စည်းကမ်းထိန်းသိမ်းရေးဆိုင်ရာ လုပ်ငန်းစဉ်အတွက် သက်သေအထောက်အထား တင်ပြရန် လိုအပ်လာပါက ၎င်းတို့အား အကြံပြုချက်ရရှိရန် ကုမ္ပဏီမှ စီစဉ်ပေးမည်ဖြစ်ပါသည်။ တိုင်ကြားထားသည့် ကိစ္စရပ်အား သင့်လျော်ပြည့်စုံလုံလောက်စွာ ဖြေရှင်းပေးရန် တိုင်ကြားသူမှ အလိုရှိကြောင်းကို ကုမ္ပဏီမှ နားလည်လက်ခံပါသည်။ သို့ဖြစ်၍ ဥပဒေဆိုင်ရာကန့်သတ်ချက်အရ စစ်ဆေးမေးမြန်းမှုများ၏ ရလဒ်အဖြေကို တရားလိုအား အသိပေးရန် ကုမ္ပဏီမှ လိုအပ်သလို ကြိုးစားဆောင်ရွက်မည်ဖြစ်ပါသည်။

၇။ဝန်ထမ်းများအတွက် မည်သည့်ကာကွယ်မှုများလုပ်ထားပေးပါသလဲ။

ကုမ္ပဏီသည် သဘောရိုးဖြင့် တိုင်တန်းလာသူအပေါ် အနိုင်ကျင့်နှောက်ယှက်ခြင်း (သို့) အပြစ်တင်ခြင်း (တရားဝင်ဖိအားပေးခြင်းအပါအဝင်) မတရားဖိနှိပ်ခြင်းများကို လက်ခံမည်မဟုတ်ဘဲ တိုင်ကြားသူအား ကာကွယ်ရန် လိုအပ်သလို အရေးယူဆောင်ရွက်သွားမှာဖြစ်ပါသည်။

တိုင်ကြားချက်အတွက် စုံစမ်းစစ်ဆေးမှု ပြုလုပ်ထားခြင်းမရှိသေးသော်လည်း မှန်ကန်သည်ဟု ယုံကြည်ရလောက်သည့် ကိစ္စရပ်များကို သဘောရိုးဖြင့် တိုင်ကြားသူတိုင်းကို အရေးယူမည်မဟုတ်ပါ။ တိုင်ကြားမှုအတွက်ကိုလည်း တတ်နိုင်သမျှ လျှို့ဝှက်စွာ ဆောင်ရွက်သွားမှာဖြစ်ပါသည်။

၈။ စိုးရိမ်ပူပန်စရာအကြောင်းကို ကုမ္ပဏီပြင်ပ အခြားနေရာများတွင် ထုတ်ဖော်ပြောဆိုနိုင်သလား။

ဤမူဝါဒသည် ကုမ္ပဏီအတွင်း တိုင်ကြားမှုအတွက်သာ ရည်ရွယ်ထားခြင်းဖြစ်ပါသည်။ အကယ်၍ ဝန်ထမ်းတစ်ဦးသည် သူ၏စိုးရိမ်ပူပန်မှုများကို ကုမ္ပဏီပြင်ပတွင် ပြောဆိုပါက လျို့ဝှက်ထားရမည့် သတင်းအချက်အလက်များကို ထုတ်ဖော်ပြောဆိုခြင်းမရှိစေရန် သတိပြုရပါမည်။

၉။အကြောင်းအရာနှင့် တိုင်ကြားသူအမည်အား လျို့ဝှက်ထားခြင်း

တိုင်တန်းသူမှ ၎င်း မကျေနပ်၍ တိုင်တန်းသည့်ကိစ္စများအား လျို့ဝှက်ထားပေးရန် တောင်းဆိုလာလျှင် ကုမ္ပဏီအနေဖြင့် လျို့ဝှက်ထားပေးမည်ဖြစ်သည်။ သို့ရာတွင် တိုင်တန်းလာသည့်ကိစ္စအပေါ် ဆက်လက် အရေးယူဆောင်ရွက်ရန်နှင့် အတည်ပြုစစ်ဆေးရန် တိုင်တန်းသူမှ ၎င်း၏အမည်ကို အသိပေးမှသာ ပိုမိုလွယ်ကူစွာ ဆောင်ရွက်နိုင်မည်ဖြစ်သည်။ အမည်မဖော် တိုင်ကြားခြင်းမျိုးဖြစ်လျှင် ကုမ္ပဏီအနေဖြင့် တိုင်ကြားသူနှင့် လိုအပ်သလို ဆက်လက်ဆောင်ရွက်သွားရန် အခက်အခဲရှိပြီး၊ စုံစမ်းမေးမြန်းမှုများကိုလည်း ပြည့်စုံလုံလောက်စွာ လုပ်ဆောင်နိုင်မည်မဟုတ်ပါ။ အကယ်၍ တိုင်ကြားသူ မည်သူမည်ဝါဖြစ်ကြောင်း ဖော်ထုတ်ခြင်းမပြုသည့်အတွက် တိုင်တန်းသည့်ကိစ္စရပ်အား ကျေနပ်လောက်သော ဖြေရှင်းမှုမလုပ်နိုင်ခဲ့လျှင် (ဥပမာ-သက်သေအနေဖြင့် တရားရုံးသို့ လာရောက်ရန် လိုအပ်လာပါက) ကုမ္ပဏီသည် တိုင်ကြားသူနှင့် အကောင်းဆုံး ဆက်လက်လုပ်ဆောင်သွားနိုင်ရန်ကို ဆွေးနွေးသွားမည်။

၁၀။ မလိုမုန်းထားသော၊ ထိခိုက်နစ်နာစေသော၊ မှားယွင်းသော စွပ်စွဲချက်

ကုမ္ပဏီသည် ၎င်းတို့၏ တည်ကြည်မှုနှင့် သမာဓိရှိမှုကြောင့် ဂုဏ်သတင်းကောင်းရှိခြင်းအပေါ် ဂုဏ်ယူပါသည်။ သို့ဖြစ်၍ မကျေနပ်၍ တိုင်တန်းလာသော ကိစ္စရပ်များအတွက် လုံလောက်သော အရင်းအမြစ်များကို သေချာစွာ စုံစမ်းစစ်ဆေးမှု ပြုလုပ်ပါမည်။ သို့ရာတွင် ကုမ္ပဏီ၏ ဝန်ထမ်းတစ်ဦးမှ တာဝန်မဲ့သော၊ မရိုးသားသော၊ မလိုမုန်းထားသော ၊ ထိခိုက်နစ်နာစေလိုသော (သို့) သက်သေအထောက်အထားမရှိသော စွပ်စွဲချက်တို့ကို ပြုလုပ်လာပါက စည်းကမ်းထိန်းသိမ်းရေးဆိုင်ရာ ကြီးလေးသော ပြစ်မှုဟု သတ်မှတ်ပြီး အလုပ်ထုတ်ခြင်းခံရသည်အထိ အရေးယူခြင်းခံရနိုင်ပါသည်။